Xunto coas ferramentas de apoio ao investimento presentes no resto dos municipios de Galicia, os proxectos de investimento situados no municipio das Pontes contan con diversas vantaxes ao investimento e a implantación de novas empresas, atendendo a diferentes elementos clave:
A zona presenta axudas públicas a fondo perdido que no seu conxunto poden alcanzar unha intensidade máxima en termos xerais do 40% do investimento empresarial.
Posibilidade de acollerse a unha axuda adicional a fondo perdido con cargo ao Plan de Desenvolvemento Económico-Industrial para As Pontes achegada polo Grupo Endesa para proxectos que se implanten nas Pontes.
Dispoñibilidade de solo industrial en condicións moi vantaxosas.
Posibilidade de financiamento cun custo inferior ao do mercado.
A Xunta de Galicia, apoia institucionalmente e politicamente, como goberno rexional comprométese a dar un tratamento preferente aos proxectos de investimento na zona.
As forzas sociais e as Organizacións Sindicais (apoian nos seus foros executivos: Mesa do Carbón, axudas e infraestruturas) comprométense a prestar todo o seu apoio aos proxectos empresariais.

Situación da OPYDE (Oficina de Promoción e Desenvolvemento Económico) como instrumento especializado de servizos empresariais que proporciona soporte á promoción industrial e que permite liderar da forma máis eficiente os esforzos privados e públicos cun obxectivo común: crear emprego e industria.

O Parque Empresarial de Penapurreira está situado no Concello das Pontes de García Rodríguez (A Coruña). O Parque Empresarial foi promovido por XESTUR CORUÑA, S.A. e a súa execución cofinanciada pola XUNTA DE GALICIA, o Instituto para la Reestructuración de la Minería del Carbón e ENDESA.

Este parque empresarial  de Penapurreira ofrece un dos solos máis baratos de toda Galicia.

Inmellorablemente comunicado por carretera a través da autovía Ferrol-Vilalba e da autopista A-9 e a súa proximidade ao porto de Ferrol.

O equipo técnico da OPYDE está á súa enteira disposición para asesorarlle respecto das posibilidades de acceso ao financiamento público para cofinanciar o seu proxecto de investimento.
 
O servizo de asistencia en materia de subvencións permitiralle:

1. Identificar todas as posibles axudas existentes para o financiamento do orzamento de investimento e/ou gasto que quere acometer unha empresa ou entidade.

2. Establecer o calendario e a estratexia a seguir para optimizar as axudas e subvencións identificadas.